Nú er komið að því að slökkt verður á allri 3G þjónustu á Íslandi. Sýn, ásamt öðrum fjarskiptafyrirtækjum, mun slökkva á síðustu 3G sendunum og 4G/5G taka alfarið við. Við hlökkum til að taka stökkið með ykkur inn í framtíðina með hraðari, stöðugri og betri þjónustu fyrir viðskiptavini.

Síðustu mánuði höfum við átt í samskiptum við viðskiptavini sem þurfa að gera ráðstafanir, hvort sem það er að skipta um símtæki eða uppfæra hugbúnað. Við hvetjum viðskiptavini okkar að hringja í númerið 620-0300 til að kanna hvort símtæki á heimilum séu stillt á 4G/5G. Ákveðin símtæki munu ekki geta hringt neyðarsímtöl í 112 þegar slökkt verður á 3G. Það er því brýnt öryggisatriði að eigendur þeirra tækja sem fengið hafa SMS, um að nauðsynlegt sé að uppfæra eða skipta út tæki sínu, bregðist við sem fyrst. Í tengslum við þessa breytingu hefur verið útbúinn sjálfvirkur símsvari 1280 þar sem notendur geta athugað hvort símtækin þeirra geti áfram hringt neyðarsímtöl eftir að slökkt hefur verið á 3G-sendum. Eigendur eldri símtækja og/eða símtækja sem keypt voru erlendis eru sérstaklega hvattir til að hringja í 1280 til að athuga hvort tækið þeirra styðji við nýjustu tækni. Það er mjög brýnt að fólk hringi alls ekki í 112 til að prófa samband, það getur skapað álag og hindrað að neyðarsímtöl nái í gegn.

Fjarskiptafélög erlendis hafa einnig hafið vinnuna við lokun 2G og 3G og því gætir þú upplifað sambandsleysi í útlöndum ef tækin þín styðja ekki 4G eða 5G.