Jafnrétti

Jafnrétti er liður í starfsmannastefnu Sýnar og er áhersla lögð á að allt starfsfólk sé metið að verðleikum og njóti jafnra tækifæra á vinnustaðnum. Starfsfólki er ekki mismunað á grundvelli kyns, kynþáttar eða þjóðernis, kynhneigðar, aldurs, trúar, skoðana eða annarra þátta.Hegðun á borð við kynbundið ofbeldi, kynbundna og kynferðislega áreitni er ekki liðin. Starfsfólki af öllum kynjum er gert kleift að samræma fjölskyldu- og atvinnulíf.Sýn hefur markað sér jafnréttisáætlun í samræmi við ákvæði laga nr. 150/2020 um jafna stöðu og jafnan rétt kynjanna. Áætlunin á að tryggja jöfn tækifæri og kjör starfsfólks af öllum kynjum og að allir fái notið sín.

Fræðsla

Fræðsla, þjálfun og þekkingarmiðlun er mikilvægur hluti af starfsemi Sýnar. Starfsmenn eiga kost á að afla sér fræðslu og þekkingar sem miðar að því að auka hæfni þeirra í starfi og efla hæfileika þeirra til að takast á við ný og fjölbreytt verkefni í síbreytilegu starfsumhverfi. Unnið er eftir fræðsluáætlun hjá fyrirtækinu ásamt því sem markviss nýliðafræðsla á sér stað í upphafi starfs.

Jafnvægi milli vinnu og einkalífs

Áhersla er lögð á jafnvægi milli vinnu og einkalífs. Við leitumst við að finna þann milliveg sem hámarkar afköst og starfsánægju. Framkvæmdar eru árlegar vinnustaðagreiningar til að sjá hvað gengur vel og hvað má fara betur og eru niðurstöðurnar nýttar til að gera enn betur.

Heilsa starfsmanna

Við stöndum vörð um heilsu, öryggi og vellíðan starfsmanna og eru allir hvattir til að huga að heilsunni með því að hreyfa sig, borða hollan mat, vinna bug á streitu og vera meðvitaðir um mikilvægi andlegrar heilsu.

Við höfum einsett okkur að ganga um landið af virðingu, með umhverfisvernd að leiðarljósi. Þannig er ávallt leitast við að framkvæmdir á vegum félagsins valdi sem minnstu umhverfisraski. Stofnun Sendafélagsins, samrekstrarfélags með Nova, um rekstur farsímadreifikerfa félaganna er liður í þessari stefnu en með því náum við að samnýta senda og auka þannig hagræði ásamt því að minnka skaðleg umhverfisáhrif sem og sjónmengun.

Við lágmörkum notkun á óendurnýjanlegum auðlindum og losun skaðlegra efna út í umhverfið eins og kostur er. Starfsfólk er hvatt til að nýta sér fjarfundabúnað þar sem því verður við komið til að lágmarka mengun sem hlýst af ferðalögum jafnt innan lands sem utan.

Sýn hefur sett sér það markmið að flokka allt sorp sem fellur til í starfseminni, auka þannig endurvinnslu og draga úr ónauðsynlegri urðun á sorpi.

Endurvinnsla

Til að hvetja til endurvinnslu og endurnýtingar á gömlum símtækjum býður Sýn viðskiptavinum að skila slíkum tækjum í næstu verslun. Sé símtækið í þokkalegu standi kaupir GEMSA oft af viðskiptavini og kemur áfram til endurvinnslu eða endurnýtingar.

Samgöngur

Þá hefur félagið sett sér samgöngustefnu með að markmiði að auðvelda starfsfólki að ferðast til og frá vinnu á hagkvæman og vistvænan máta auk þess,að hvetja starfsfólk til að nýta sjálfbæra ferðamáta við leik og störf.

Loftslagsmál

Árið 2015 skrifuðum við undir Loftslagsyfirlýsingu Sameinuðu þjóðanna og höfum í því samhengi sett okkur ákveðin markmið í loftslagsmálum. Miðast þau að því að draga úr mengun og hafa þannig jákvæð áhrif á vistspor okkar. Það er mat stjórnenda Sýnar að loftslagsbreytingar hafi ekki áhrif á starfsemi eða rekstur félagsins.

Rafrænir reikningar

Árið 2012 hóf Sýn að senda reikninga til viðskiptavina á rafrænu formi til að draga úr pappírssóun. Í dag fá flestir viðskiptavina reikninga á því formi en aðeins 10,7% reikninga eru nú prentaðir.

Fyrirtæki þurfa að tileinka sér það viðhorf að þau geti haft jákvæð áhrif á samfélagið á sama tíma og viðskiptalegum árangri er náð. Samfélagsábyrgð snýst því ekki eingöngu um það hvernig fyrirtæki ráðstafa hagnaði sínum heldur einnig hvernig þau starfa, til að ná fram tilteknum hagnaðarkröfum.

Það er markmið Sýnar að félagið sé rekið með hagnaði og ráðdeild. Mikil áhersla er lögð á fyrirtækið sé rekið á sem skilvirkastan hátt og að ávallt sé leitað bestu tilboða í þær auðlindir sem notaðar eru án þess þó að það komi niður á gæðum. Notaðar eru samræmdar innkaupaaðferðir fyrir heildina til að tryggja yfirsýn og njóta stærðarhagkvæmni. Þannig er virði samninga hámarkað, fjárfestinga- og rekstrarkostnaður lækkaður, áhætta lágmörkuð og hagnaður þannig aukinn. Sýn hefur ennfremur notið góðs af því að geta gengið að og notið kjara sem Vodafone Group hefur náð á alheimsvísu.