Sýn hf. hefur ákveðið að hætta dreifingu á línulegu og ólínulegu sjónvarpsefni sínu yfir dreifikerfi Símans. Þessi ákvörðun er liður í þróun dreifileiða fyrirtækisins og endurspeglar breyttar áhorfsvenjur og tækniframfarir á markaði. Allt efni Sýnar – þar með talið efni SÝN+ og SÝN Sport – verður áfram aðgengilegt öllum landsmönnum í gegnum appið okkar, SÝN Sjónvarpsappið (áður Stöð 2 appið), sem er fáanlegt á öllum helstu snjalltækjum.

Við leggjum áherslu á að þessi breyting snýst ekki um að loka á aðgengi, heldur að færa þjónustuna yfir í sveigjanlegri og nútímalegri dreifileið sem byggir á OTT-tækni (Over-The-Top) – aðferð sem flestir neytendur þekkja nú þegar frá þjónustum á borð við Netflix og Disney+. Notendur geta því áfram notið efnis okkar, óháð því hvaða fjarskiptafélagi þeir tilheyra.

Erlend fyrirmynd

Sýn telur mikilvægt að mæta kröfum neytenda og einfalda sinn rekstur í flóknu samkeppnisumhverfi. Til samanburðar má nefna að alþjóðlegar efnisveitur eins og Netflix, Viaplay og Disney+ dreifa einungis efni sínu í gegnum eigin vettvang – án þess að fyrir séu sérstakir dreifingarsamningar við fjarskiptafélög. Sama gildir um SÝN Sjónvarpsappið (áður Stöð 2 appið): notandi með netaðgang getur tengst þjónustunni með einföldum hætti og notið efnis Sýnar á eigin forsendum.

Skýr markaðsþróun

Á síðustu árum hefur orðið afgerandi færsla frá hefðbundnum sjónvarpsdreifikerfum yfir í internetbundna streymisþjónustu. Samkvæmt nýjustu tölum notar stór hluti íslenskra heimila slíkar lausnir, og þróunin sýnir að áskriftir í hefðbundnum kerfum eru stöðugt að dragast saman.

Við erum sannfærð um að þessi þróun geri þjónustu okkar aðgengilegri, hagkvæmari og einfaldari – og hvetjum alla notendur til að nýta sér þá möguleika sem appið býður upp á.

Heildsöluaðgangur áfram í boði

Við viljum jafnframt undirstrika að heildsöluaðgangur að efni Sýnar verður áfram í boði fyrir þá sem óska – í gegnum appið. Þetta fyrirkomulag tryggir jafna stöðu á markaði og er í fullu samræmi við það sem tíðkast í dreifingu efnis bæði hérlendis og erlendis.