Sýn okkar allra
Sýn gegnir mikilvægu hlutverki í íslensku samfélagi sem fjarskipta- og fjölmiðlafyrirtæki. Þjónusta félagsins gegnir lykilhlutverki í grunninnviðum samfélagsins og tryggir öflug samskipti einstaklinga, atvinnulífs og opinberra aðila um land allt. Félagið starfar í samræmi við lög og reglur og leggur áherslu á ábyrga stjórnarhætti, gagnsæi og fagmennsku. Virðing og jafnræði eru grundvallargildi í öllum samskiptum félagsins við starfsfólk, viðskiptavini og birgja.
SÝNum stuðning
Sýn leggur áherslu á virka og ábyrga þátttöku í samfélaginu og styður fjölbreytt verkefni á sviði íþrótta, menningar og góðgerðarmála. Stuðningurinn felst meðal annars í fjárframlögum, samstarfssamningum, þjónustuafsláttum og öðrum framlögum sem miða að því að skapa jákvæð samfélagsleg áhrif. Við val á samstarfi og styrkjum er litið til þess að verkefnin samræmist stefnu félagsins um sjálfbærni og stuðli að jákvæðum og mælanlegum samfélagslegum áhrifum.
Á árinu 2025 hélt félagið áfram samstarfi við Landsbjörgu og setti jafnframt af stað verkefnið SÝNum stuðning, þar sem ágóði rann til Bleiku slaufunnar.
Fréttir og dagskrá
Fréttastofa Sýnar miðlar daglega upplýsingum sem varða almenning og hafa samfélagslegt gildi, þar á meðal um öryggismál og málefni líðandi stundar. Félagið framleiðir jafnframt fjölbreytt dagskrár- og fréttaefni sem stuðlar að upplýstri umræðu og aukinni vitund um málefni sem skipta samfélagið máli. Dagskrá Sýnar endurspeglar íslenskt samfélag í allri sinni fjölbreytni. Með vönduðu og fjölbreyttu efni er lögð áhersla á að miðla upplýsingum, segja sögur fólks og skapa vettvang fyrir umræðu. Á meðal verkefna ársins voru meðal annars:
Blóðbönd, dramatísk þáttaröð um fjölskyldutengsl og leyndarmál.
Flugþjóðin, heimildaþættir Íslendinga og flugið, bæði atvinnugreinina og áhrif hennar á samfélagið, ferðalög og daglegt líf.
Hvar er best að búa, lífsstíls- og samfélagsþáttur þar sem mismunandi búsetukostir á Íslandi eru skoðaðir og bornir saman.
Stóra stundin, viðtals- og mannlífsþáttur þar sem fólk segir frá stórum augnablikum í lífi sínu, sigrum, áskorunum og tímamótum.
Tilbrigði um fegurð, heimilda- og umræðuþáttur sem fjallar um fegurð, líkamsímynd og samfélagsleg viðmið frá ólíkum sjónarhornum.
Viltu finna milljón, afþreyingarþáttur sem sameinar skemmtun og þátttöku almennings. Þátturinn stuðlar að fjármálalæsi, hvatningu og virkni áhorfenda.
Ísland í dag og Gott kvöld, daglegur frétta- og mannlífsþáttur sem styrkir lýðræðislega umræðu með því að fjalla um innlend málefni, mannlíf og samfélagslegar áskoranir.
Okkar eigið Ísland, þar sem Garpur Elísabetarson ferðast vítt og breitt um Ísland með góðu fólki og lendir í ýmsum ævintýrum. Útivist á áhugaverðum stöðum er hér í öndvegi og náttúra Íslands í allri sinni dýrð.
Rax – Augnablik, sjónrænir og hugljúfir þættir byggðir á ljósmyndum RAX, þar sem íslensk náttúra og stemning fá að njóta sín.
Kryddsíldin, sem hefur í yfir þrjá áratugi verið vettvangur stjórnmálaumræðu á gamlársdag.
Halló heimur með Skoppu og Skrítlu, er barnaefni sem styður við þroska og gleði yngstu áhorfenda.
Gott kvöld, kvöldþáttur með blöndu af viðtölum, menningu, tónlist og umræðu líðandi stundar.
Á árinu var jafnframt stigið stórt skref í að auka aðgengi að efni með opnun línulegrar rásar fyrir alla landsmenn.
