Árið 2025 markaði tímamót í starfsemi Sýnar. Félagið gekk í gegnum umfangsmikla endurmörkun, einfaldaði vöruframboðið og með skýrari heildarsýn var lagður grunnur að sterkari og samræmdari ásýnd félagsins. Endurkoma enska boltans, ásamt öflugri innlendri dagskrárgerð og sterkum fókus á íslenskt hágæða sjónvarpsefni, styrkti enn frekar stöðu Sýnar í hugum landsmanna.

Sýn gegnir mikilvægu hlutverki í íslensku samfélagi og hefur frá upphafi lagt áherslu á virka þátttöku og samfélagslegt framlag. Viðskiptavinurinn er ávallt í forgrunni og endurspeglast það skýrt í verkefnum og forgangsröðum á árinu. Í eftirfarandi yfirferð er litið til helstu viðburða og árangurs ársins 2025.

Í kjölfar endurmörkunar Sýnar var sett af stað umfangsmikil kynningarherferð til að kynna Sýn sem sameinað vörumerki félagsins. Handrit auglýsingarinnar var unnið með auglýsingastofunni ENNEMM og í samstarfi við Auðunn Blöndal og Steinþór Hróar, og tóku um 40 starfsmenn Sýnar þátt í gerð hennar. Þar var lögð áhersla á að sýna samheldni og sameiningu starfseminnar undir merkjum Sýnar.

Herferðin fékk afar jákvæð viðbrögð og vakti mikla athygli. Auglýsingaeftirtekt mældist hæst 48%, sem er sögulega hátt hlutfall hjá félaginu og sérstaklega sterkur árangur fyrir nýtt vörumerki. Niðurstöðurnar staðfesta að auglýsingaherferðin skilaði markmiðum sínum og styrkti stöðu Sýnar á markaði.

Einfaldara og skýrara vöruframboð var eitt af lykilmarkmiðum ársins og tók Sýn stórt skref í þeirri vegferð þegar nýtt pakkaframboð var kynnt þar sem pökkum var fækkað úr rúmlega 100 niður í 9 vel skilgreinda pakka. Með breytingunni verður valið auðveldara fyrir viðskiptavini og samskipti því markvissari, samhliða því sem flækjustig í rekstri minnkar verulega. Nýju pakkarnir styðja við þá stefnu Sýnar að bjóða upp á einfaldari og skilvirkari lausnir.

Nýr kafli hófst í íslenskri sjónvarpssögu þann 1. ágúst þegar SÝN línulega sjónvarpsstöðin, áður Stöð 2, var gerð aðgengileg öllum landsmönnum án endurgjalds. Með þessari breytingu tók Sýn næsta skref í vegferðinni sem hófst með samruna Vodafone og Stöðvar 2 undir merkjum Sýnar og mætir breyttum áhorfsvenjum. Samhliða var lögð áhersla á að styrkja streymisveituna SÝN+ þar sem áskrifendur fá sveigjanlegt aðgengi, forskot á sæluna þegar kemur að nýrra efni og aðgang að efni sem ekki er sýnt á hefðbundinni dagskrá sjónvarpsstöðvarinnar, heldur er eingöngu aðgengilegt í streymisveitunni.

Á árinu 2025 seldi Sýn 4G og 5G farsímadreifikerfi sín til Sendafélagsins, sem er í eigu Sýnar og Nova. Með sölunni færðist rekstur og uppbygging farsímainnviða yfir til Sendafélagsins, sem mun annast dreifingu farsímaþjónustu fyrir félögin. Með þessari breytingu var stigið mikilvægt skref í átt að einfaldari rekstri og aukinni hagkvæmni, samhliða því að tryggja áframhaldandi öfluga farsímaþjónustu fyrir viðskiptavini.

Menningarnæturtónleikar Bylgjunnar í Hljómskálagarði voru einn stærsti og mest sótti viðburður ársins hjá stöðinni. Hljómskálagarðurinn fylltist af tónlist og gleði þegar fram komu Herra Hnetusmjör, Klara Einars, Skítamórall, GDRN, Júlí & Dísa, Vibe og Nýdönsk.

Tónleikarnir hafa fest sig í sessi sem hápunktur Menningarnætur og sýna kraft Bylgjunnar sem öflugs vettvangs íslenskrar tónlistar.

Á árinu 2025 var Sýn á meðal þeirra fyrirtækja sem fengu viðurkenningu Jafnvægisvogar FKA, sem miðar að auknu jafnvægi kynja í efsta lagi stjórnunar. Þetta er þriðja árið í röð sem Sýn nær þessum árangri og endurspeglar hann markvissa vinnu við að byggja upp fjölbreyttan og jafnan mannauð. Áhersla á jafnrétti, virðingu og tækifæri fyrir alla er áfram leiðarljós í mannauðsstefnu Sýnar.

Árið 2025 var mjög sterkt ár hjá Bylgjunni samkvæmt rafrænum ljósvakamælingum Gallup. Stöðin var með yfirburðastöðu hvað varðar hlustun og átti meirihluta mest hlustuðu klukkustunda ársins, bæði í aldurshópnum 12–80 ára og 18–49 ára. Í fyrstu mælingum ársins náðu Bylgjan, Gull Bylgjan og Létt Bylgjan samanlagt nær 50% hlutdeild í aldurshópnum 12–49 ára. Árangurinn undirstrikar sterka stöðu útvarpsstöðvanna innan samstæðu Sýnar, bæði hvað varðar vinsældir meðal hlustenda og sem öflugir auglýsingamiðlar.

Bylgjulestin hélt áfram ferð sinni um landið og heimsótti fjölmarga staði sem og viðburði þar sem hlustendur komu saman. Fyrsta stopp var í Hveragerði á Hengli Ultra, þaðan lá leiðin til Akureyrar á Bíladaga, Hallormstaðarskóg, Írska daga á Akranesi, Kótelettuna á Selfossi, Götubitahátíðina í Hljómskólagarðinum, Hjarta Hafnarfjarðar og sumrinu var svo lokað í Vaglaskógi á tónlistarhátíð Kaleo, Vori í Vaglaskógi. Bylgjulestin færði útvarpið nær fólki með beinum útsendingum og góðri stemningu víðs vegar um landið og er orðinn fastur og vinsæll hluti af sumrinu hjá Bylgjunni.

Á árinu 2025 varð umtalsverð aukning í áhorfi á sjónvarpsstöðvar Sýnar. Gögn Gallup sýna að daglegt áhorf hefur aukist um 48% samanborið við sama tímabil á fyrra ári, eftir að enski boltinn var tekinn inn í dagskrána og línuleg dagskrá opnuð í ágúst. Þetta endurspeglar bæði vaxandi áhuga almennings á sjónvarpsefni félagsins og styrk í dagskrárvali sem nær til fjölbreyttra hópa landsmanna. Viðmiðunarupplýsingar benda til þess að 67 þúsund manns horfi daglega á sjónvarpsstöðvar Sýnar, auk þess sem auglýsingasala og vörumerkjavitund hefur fylgt þessari auknu neyslu.

Þessi árangur undirstrikar hvernig stefna Sýnar um að efla sjónvarpsútsendingar og nýta íþróttaviðburði sem þátt í dagskrárgerð hefur skilað sér í auknum sýnileika og virku áhorfi meðal borgara.

Á árinu 2025 stóð Sýn að fjölbreyttri og metnaðarfullri innlendri dagskrárgerð sem hlaut afar góðar viðtökur meðal áhorfenda. Á meðal verkefna ársins voru nýjar seríur af vinsælum þáttaröðum eins og Alheimsdraumurinn, Ísskápastríð, Kviss, Heimsókn, Gulli byggir, Halló heimur og Flugþjóðin en þessir þættir njóta mikilla vinsælda á meðal áskrifenda.    Nýjar þáttaseríur litu líka dagsins ljós og þar má meðal annars nefna Spurningasprett, A&B - þættir sem fjölluðu um tvíburabræðurna Arnar og Bjarka, Hristur en ekki hrærður, Séð & heyrt, Blóðbönd, Gott kvöld, Tilbrigði um fegurð, Stóra stundin og Brjánn.  Heimildamyndin Fjallið það öskrar var frumsýnd á árinu sem enginn má láta fram hjá sér fara.    Dagskráin endurspeglar skýra stefnu Sýnar um að tryggja áhorfendum aðgang að vönduðu og fjölbreyttu íslensku efni og styrkja stöðu félagsins sem leiðandi afl í innlendri afþreyingu.

Vísir sýndi Bakgarðshlaupið í Öskjuhlíð í beinu streymi 10. maí 2025, samhliða beinni textalýsingu. Alls hófu 203 keppendur keppni og stóð útsendingin fram á nótt. Kristinn Gunnar Kristinsson sigraði eftir 43 hringi og lauk keppni kl. 03:45 aðfaranótt 12. maí.

Yfir 70 þúsund manns fylgdust með Bakgarðshlaupinu í september í beinu streymi en útsendingin stóð samfellt frá laugardagsmorgni til mánudagsmorguns.

Að baki útsendingunni stóð reynslumikið teymi ásamt fréttastofu Vísis sem sinnti ítarlegri umfjöllun á meðan á keppni stóð, bæði á Vísi, Bylgjunni og í kvöldfréttum.